KIROLARI askorentzat udara izaten da urteko sasoirik mugituena, eta Maitane Iruretagoiena atleta hernaniarraren kasua ere hala da. Asteburuan Madrilen izango da, junior mailako topaketa internazionalean. Joan den asteburuan berriz, Bartzelonan korritu zuen absolutu mailan, Espainiako txapelketan. Uztailaren amaieran aldiz, Serbian lehiatu zen, Europako txapelketan.
Topaketa internazionala
Iruretagoiena hernaniarrak Madrilera bidaiatu beharko du asteburuan. Bertan junior mailako topaketa izango da, eta atletak 100 metroko eta 4x100 erreleboko probetan hartuko du parte. Espainiako selekzioarekin lehiatuko da, eta aurrean izango dituzte Argelia, Italia, Frantzia, Grezia, Maroko, Tunez eta Turkia.
Espainiako txapelketan
hamargarren
Joan den asteburuan jokatu zen Espainiako txapelketan ere Iruretagoienak 100 metroko eta 4x100 erreleboko probetan hartu zuen parte. 100 metroan 10garren postua lortu zuen. 4x100 erreleboan berriz, bere seriean, 12,19 denbora eginda, 3garren geratu ziren. Hala ere, ezin izan zuen finalera pasa: «Semifinaletan 12,19 denbora egin nuen arren, haizea kontra izan genuen, eta ezin izan nuen finalerako pasea lortu».
Europako txapelketan esperientzia bikaina Atleta hernaniarrak Mallorcan jokatutako Espainiako txapelketa irabazi ondoren, Europako txapelketa jokatu zuen, Serbian, uztailaren 23tik 25era. 100 metroan, haizea kontra izan zuen eta 12,37 denbora egin zuen. 4x100 erreleboan ez zuten finalera pasatzea lortu. Hala ere, Maitanek adierazitakoaren arabera, «oso esperientzia ona izan zen».