UdaRA opor garaia izaten da herritar askorentzat, eta hortaz, odol emaile askorentzat ere bai. Uztailan eta abuztuan jaitsi egiten da odol emaile kopurua Euskal Herrian, %25 inguru. Horregatik, egun dagoen eskaerari aurre egiteko, Gipuzkoako Odol Emaileen Elkarteak kanpaina jarri du martxan. Kanpainaren helburua da, Gipuzkoan udarako hilabeteetan espero diren 2.000 odol emaileez gain, 300 gehiago lortzea. Udara ez den beste edozein hilabetetan, 2.500-2.900 pertsonek ematen dute odola.
Hernanin, hilabeteko bataz
bestekoa 67 odol-emailekoa da
Gipuzkoako Odol Emaileen Elkartetik adierazitakoaren arabera, gaur egun dagoen eskaria betetzeko, urteko odol-emaile kopuru egokia izango litzateke 1.000 biztanleko 50 donazio. Hernaniren kasuan, kopuru horretara iristeko, urtean 900 lagunek eman beharko lukete odola; eta datuak begiratuz gero, ez daude oso urruti. Joan den urtean, 2.008an, guztira 806 emaile izan ziren herrian, hilabetean 67 inguru.
Gipuzkoako Odol Emaileen elkarteak, Hernaniko balorazioa egiteko garaian, Kronikari adierazi dio odola hilabetean behin emanda, lortu nahi diren datu horietara iristea ez dela erraza; baina Hernani ez dabilela oso urruti. Gainera, adierazi dute badirela hernaniarrak odola Donostian ematen dutenak.
Hitzordua hilabeteko
aurreneko asteartean
Hernanin odola hilabeteroko aurreneko asteartean eman daiteke, anbulatorioan, arratsaldeko 18:30etatik 20:30etara. Odol-emaileak bete beharreko baldintzak berriz, besteak beste, ondorengoak dira:18-65 urte bitartean izatea eta osasun ona izatea.