atzokoan Lorentzok Inaziorekin bat egin zuen eta egun zoragarriaz gozatzeko aukera izan zen. Hala, Santa Barbara auzoan ospatzen den San Inazio jaieguna ezin hobeto joan zen. Bertsolariak eta trikitilariak goizetik hasi ziren giroa alaitzen eta pixkanaka gerturatzen joan ziren festarako prest zirenak. Ohiko mezan ere jende asko izan zen, baina batez ere, herri kiroletan bildu zen jendetza.
Jendea gogotik animatzen
Nabari da jendeak gozatu egiten duela urtero egin ohi diren herri kirolekin, gogotik animatu eta txalotu baitzituen herriko kirolariak. Hori bai, itzalpetik gehienek.
Aurten aizkoran, txingan eta harrijasotzen neurtu dira herriko bi taldeak eta biak ederki aritu baziren ere, azkenean Larra, Barrenetxea lehengusuak eta Paollak osatutako taldea nagusitu zen. Bigarrenak Larrabide, Arretxe, Atxega eta Suharri izan ziren.
Egun osoan atsedenik ez
Herri kirolak bukatzean, indarrak berreskuratzeko bazkari ederra egin zen eta bazkalondoren, bikotekako toka txapelketa. Bikote mordoak hartu zuen parte.
Arratsaldean, haurrek jokoekin eta txokolatadarekin gozatu zuten, eta dantzarako gogoz zirenek erromeriarekin.