Kirmen Uribek eta Judith Jauregik olerkia eta musika batuko dituzte gaur, Chillida Lekun

chillida Lekun lau kon­tzertu zeuden iragarrita Mu­sika Hamabostaldiaren ba­rruan. Orain arte bi kontzertu eman dituzte eta gaur izan­go da hirugarrena. Kir­men Uri­be eta Judith Jau­regik eskainiko dute gaurko kontzertua. Bertan, olerkia eta musika ba­tuko dituzte. Arratsaldeko 19:00etan izango da eta ordu bete lehenago irekiko dituzte ateak. Sa­rrerak 10 euroan dau­de salgai eta internet bi­dez erosi daitezke www.quincenamusical.com helbidean.

Olerkia eta musika elkarrizketan
Gaurko emanaldian olerkia eta musika elkarrizketan ariko dira Kirmen Uribe olerkariarekin eta Judith Jauregi pianojolearekin. XXgarren mendeko sortzaileen lanak berreskuratuko dituzte. Jau­regik Ravel, Albeniz eta Bartok musikarien obrak in­terpretatuko ditu eta Uribek Unamuno, Lauaxeta, Orixe eta Lizar­diren olerkiak errezitatuko ditu. Besteak beste, honako obrak interpretatuko ditu Jau­regik: Aita Donostiaren Euskal Preludioak; Isaac Albe­nizen Otoiz eta Zanbra; Bela Bartoken Suite; eta Enrique Granadosen Quejas o la maja y el ruiseñor eta El Pelele.

Uribe idazle oparoa
Kirmen Uribe idazle ondarrutarrak lehenago ere uztartu izan du literatura bestelako arteekin. Hainbat ikuskizunetan hartu izan du parte. 2000 urtean, Bar Puerto jarri zuen abian Mikel Urdanga­rin eta Josu Eizagirrerekin batera. Hala, taula gainean poesia, musika, bideoa eta ahozko historia bildu zituzten. Hiru urte beranduago, berriz, Zaharregia, txikiegia agian CD-liburua argitaratu zuen Mikel Urdangarin, Bingen Mendizabal eta Rafa Rueda musikariekin eta Mi­kel Valverde ilustratzailearekin. Gaurkoan, euskal idazleen artean, Lizardiren olerkiak ekarriko ditu gogora Uribek, ondo ezagutzen duen idazlea. Izan ere bere lehenengo lana berari buruzko saiakera izan zen; Lizardi eta erotismoa izenekoa.

Jauregi pianojole gaztea
Judith Jauregi pianojole do­nostiarrak 24 urte besterik ez ditu, baina sari ugari jaso ditu Estatuan eta baita na­zioartean ere. Aipagarrie­nak dira Valladolideko Frechill-Zuloa­ga VIII Nazio­ar­teko Piano Saria eta XXVII Al­bacete Hiri­ko Pianojole Gaz­teen Txapel­keta. Horrez gain, azken txapelketa horretan Chopinen Musikaren In­ter­pretazio One­na­ren Saria ja­so zuen eta baita musika españolaren interpretazio onenarena ere. Donostiako Musikaldia be­zalako festibal ugaritan jo izan du, hala nola: Bilboko Musika Festibalean, Castell de Peralda Nazioarteko Musika Festibalean, Dino Cianni Festibalean... Gaur Chillida Lekun, be­raz, musika eta literaturaren arteko elkarrizketaz gozatzeko aukera ederra izango da bi euskal artista haundiren eskutik.

Azken kontzertua datorren igandean
Menarekin Datorren igandean azken emanaldia izango da Chi­llida Lekun. Carlos Mena kontratenoreak emango du kon­tzertua Susana Garcia de Salazar pianojolearekin. Kon­­­tratenore gasteiztarraren be­rezitasun nagusia da ahots nahastezina duela, eta hortaz, oso ezberdinak diren lanak jorra ditzake. XXga­rren mendeko euskal eta europar konpositoreen obrak eskainiko dituzte. Bes­teren artean, Vaughn-Willi­ams, Listz, Gu­ridi, Isasi, Bernaola eta Erkorekaren lanak. Datorren igandean 19:00­e­tan izango da eta sarrera 10 euroan dago.