Aranoko jaien azken eguna gaur izango da eta San Juakin eta Santa Ana eguna ospatuz, jubilatu eta umeentzako ekitaldiak antolatu dituzte. Goizeko 10:00etan Diana izango da eta ordu bete beranduago meza. Ondoren hamaiketakoa egingo dute Kontsejuan. Eguerdiko 12:00etan gazteen arteko pelota partiduak izango dira.
Jubilatuen bazkaria eta
txokolatada
Eguerdiko 14:00etan jubilatuen bazkaria antolatu dute. Kontsejuan izango da eta Joxe Agirre eta Imanol Lazkano bertsolariak arituko dira giroa jartzen, Jexuxen Jazbanarekin.
Umeek ere izango dute dibertitzeko aukera. 15:30etatik aurrera puzgarriak eta jokuak izango dituzte plazan eta 18:30etan txokolatada.
Arratsaldeko 19:00etan Arno ganadutegiko animalien showaz gozatu ahal izango da. Bestalde, 20:30etan parrillada egingo da eta ondoren, Oskar Estanga ariko da musikarekin ilunabarra girotzen. Modu ederrean agurtuko dituzte jaiak Aranoarrek.
Santio egun
ederra
Santio eguna ospatu zuten atzo Aranon. Pelota partidua, herri kirolak eta bertso saioa izan ziren, besteak beste, eta urteroko oilasko jatea ere bai. Giro ederrean pasa zuten egun osoa eta hala jarraitu zuten askok goizaldera arte.