Festetako egun haundiak gaur eta bihar izango dira Aranon. Eta gaur Santio Eguna izanda, Diana eta mezarekin hasiko da jai eguna. Eguerdiko 12:30etan betiko pelota partidua jokatuko da Arano eta Goizuetako afizionatuen artean.
Herri kirolak eta bertsoak
Arratsaldeko 18:00etan Iparraldeko jokuekin herri kirolak egingo dira. Bestalde, Nazabal eta Arrospide aizkoran lehiatuko dira. Ondoren, bertsolarien txanda izango da. Afaltzeko orduan, 22:00etan, ohiko oilasko jatea izango da San Roke elkartean eta ondoren, Kupela taldearekin dantzaldia goizaldera arte. Tartean herriko festen aldeko rifak zozketatuko dira. Goizaldean baratxuri zopa izango da.
Sekulako tortilak atzo
Atzo 18:00etan hasi ziren jaiak eta ordutik izan zen zertaz gozatu. Plazan feria egin zen eta bertako produktuen eta eskulanen erakusketa egin zen. Patata tortila lehiaketa ere bai eta sekulako tortilak egin zituzten. Baina ez zen jaki bakarra izan, basurdea ere nahi adina baitzegoen. Eta guztia bultzatzeko sagardoa.