santio eguna eta larunbata izanda, egitarau ederra prestatu dute gaurko egunerako Astigarragan. Goizeko 07:00etan aulki jokoa egingo da dultzaineroek alaituta, Foru plazan. Irabazleak saria izango du eta ez nolanahikoa, bi lagunentzat otordua. Ordu garai horretan esna ibiliko diren gehienak gaupasa egindakoak izango dira ziurrenik eta gosaltzeko aukera ere izango dute txokolate-jana egingo baita. 09:30etan, aldiz, txistularien diana.
Kirolerako tartea ere bai
Kirola egin nahi duenarentzat izango da aukera. 10:00etan Iker Ruizen oroimenezko saskibaloi txapelketa hasiko da. Ordu bete beranduago txirrindularitza txapelketa eta 11:30etan, Xake txapelketa. Eguerdian, 13:00etan, bazkaltzeko ordua iritsi aurretik, Los Pasai txarangarekin girotuko da herria.
Arratsaldean ez da atsedenik izango. 16:00etan goitibehera txapelketa antolatu dute. Hori bai, parte hartzeko izena aurrez eman behar da. 18:00etan dantza-erakustaldia izango da eta beranduxeago bertso desafioa. Haurrentzat zenzen puzgarrien entzierroa egingo da eta ilunabarrean, Niño Costriniren umorezko zirku ikuskizuna.
Musika eta dantza
Gaueko 22:30etatik aurrera musikaren txanda izango da herriko gune ezberdinetan. J. Barandiaran plazan, Abiba diskoteka izango da eta txosna gunean Trifulka eta Itziarren semea. 23:30etan Larrain-dantza herrikoia egingo da Foru plazatik abiatuta.
Atzo indarrak hartzen
Atzo, asteburuari aurre egiteko martxa eta indarra hartu zituzten herritarrek. Bazkaria egin zen txosna gunean eta gazte ugari bildu zen. Haurrek egunean zehar puzgarriak izan zituzten eta arratsaldean apar-jaia. Ilunabarrean palaz, pilotaz eta futbolaz gozatu zuten bertaratutakoek. Berandura arte jarraitu zuen giroak.