Pasabideetako baimen edo lizentzien inguruko araudia onartu berri du Udalak. Horren arabera erabakiko da esate baterako, garaje baterako sarbidea erabat libre uzteko baimenik eman edo ez. Araudia herri osorako izango da eta orain arte baimendutakoei eta horrenbestez, erabiltzen ari diren pasabideei ere aplikatuko zaie. Horregatik, nahiz eta gaur egun horrelako baimen baten jabe izan, berriz eskatu beharra dago.
Baimen motak
Udalak ematen dituen pasabide baimenak mugagabeak izan daitezke, iraupen mugarik ez dutenak alegia, edo behin-behinekoak edo mugatuak, aldi baterako emandakoak alegia, obra bat egiteko emandakoak, esate baterako.
Gainera baimenak beste bi eratakoak izan daitezke: etengabeak, ibilgailuak eguneko 24 orduetan pasatzeko modukoak, eta ondorioz egun osoan bidea libre behar dutenak, edota ordukakoak, ordu batzuetarako balio dutenak.
Pasabide iraunkorra
Onartutako ordenantzaren arabera, honako kasuetan bakarrik emango dira baimenak: erakunde eta instituzio ofizialei, beti ere interes orokor eta publikoak tartean badaude; garaje edo aparkaleku publiko zein pribatuei; familia bakarreko edo biko etxebizitzetako garajeei; gasolina zerbitzuguneei; garraio zerbitzu publikoko enpresei; klinikei, erietxeei edo asistentzia zentroei, eta salbuespen gisa, merkataritzako edo zerbitzuetako lokalei, arrazoituz gero.
Ordu batzuetarako
Orduka denean, egunean 12 orduz izango da gehienez, eta ezin izango da larunbat arratsaldetan eta jaiegunetan (salbuespenezko egoeratan bakarrik onartuko da, eta behar-beharrezkoa bada).
Honelako kasuetan bakarrik emango dituzte: industria eta merkataritza biltegiei; eraikuntza, zaharberritze eta konpontze lanetarako; tailer mekanikoei, kontzesionarioei eta abarrei; eta ezaugarri beretsuetako beste jarduera batzuei, baimena lortuz gero.
Lizentziarik ez
Araudiak dio ez dela pasabide lizentziarik emango besteak beste honako kasuetan: ibilgailuek berdeguneren bat zeharkatu behar badute; 5 metro zabal baino gehiago den espaloi publikoa edo oinezkoentzako guneak edo pasabide bat zeharkatu behar denean, non eta garaje komunitarioak ez diren; oinezkoen pasabide bat zeharkatu behar denean edo hartatik 5 metro baino gutxiagora pasa behar denean; ibilgailuek espaloien, lorategien, aparkaleku publikoen eta abarren ohikoen erabilera publikoa eragozten duenean.
Eskaera asko banan banan aztertuko dituzte Udaltzainek eta udal zerbitzuek, esate baterako lehentasunezko bideei, bide nagusiei alegia, eragiten dieten eskaerak.
Gaur egun daudenentzat ere eskatu behar da
Baimendutako pasabide guztiek, baita gaur egun baimenduta daudenek ere, ordenantza berriaren araberako baimena eskatu behar dute. Orain arte era askotako seinaleak zeuden, zaharrak era berriagoak, batzuk baimenik gabe jarriak eta baten batzuk jabeek berek eginak ere bai. Eta hori konpontze aldera dator araudi berria. Hemendik aurrera seinalea bakarra izango da eta homologatua. Seinalea jartzeaz gain, lurreko markak ere jarriko dira. Obra egiteko balitz, horretarako baimen guztiak ere bete beharko lituzke.
Interesa duen jabeak edo titularrek eskatu behar dute. Elkarteen kasuan, ordezkariek; obren kasuan, obraz arduratzen denak eta udal kontzesioetan, kontzesiodunek.
Pausuak
Ondorengo dokumentazioa eraman behar da: eraikinaren edo dena delakoaren jabetza edo titulartasuna adierazten duen agiria; obren kasuan, baimena; planoak, eraikinarena, sarbidearena eta eragiten dien elementu urbanistikoena. Eskaera udal erregistrora eraman behar da, eta Udalak eskaera aztertu eta onartzen duenean, baimentzeko plaka emango dio interesdunari.