udan sartuta gaudela jakina da eta urteko sasoi honetan ezin Udako Espainiako Txapelketa aipatu gabe utzi. Izan ere, Olatz Altuna, Mañel Aizpurua eta Maitane Danborena hernaniarrak bertan izango dira beren maila Espainiako igerilari onenen artean dagoela erakusten. Gaur joango dira Kanariar Uharteetako Las Palmas hirira. Txapelketa asteartean, uztailaren 21ean, hasiko da eta hiru egunen ostean, ostiralean bukatuko da.
Helburua finaletan sartzea
Txapelketak iraungo duen hiru egun horietan Altuna eta Aizpuruak helburutzat, aurrena, finaletan sartzea izango dute. Aurten biek egin duten denboraldia ikusita Ion Murua entrenatzaileak esperantza badutela aitortu dio Kronikari, baina ezin dela segurutzat jo. «Horregatik lehenik finaletan sartzea izango da helburua eta orain arteko nibela mantentzea. Behin finalean sartuta podiuma lortzen bada hobeto».
Aurrean egoteko aukerak
Biak ere motibatuta daudela azaldu digu Muruak, esan bezala denboraldi ona egin dutenez Espainiako txapelketan aurrean egoteko aukerak ikusten dituztelako. Gogoratu du biak Espainiako Lehenengo Mailako Kopan aritu zirela apirilean eta Euskadiko errekor berriak lortu zituztela Espainiako onenen artean ibiltzeaz gain. Danborenak ere denboraldi ederra egin du.
Bardulia eta Hernani K.E.
Altuna eta Aizpurua Fortuna taldekoak dira, baina Euskadiko eta Espainiako txapelketetan Gipuzkoa mailakoa den Bardulia taldearekin aritzen dira. Hala, taldekako erreleboetan parte hartzeko aukera dute igerilariek. Danborena aldiz, Hernani K.E. taldearekin joango da.
Txapelketa bukatzean oporrak izango dituzte, beraz, orain arte egin duten denboraldiari bukaera ezin hobea emateko aukera izango dute.
Getaria-Zarautz trabesia
Bestalde, hilaren azken asteburuan Getaria-Zarautz igeriketa trabesia izango da.