udalak hitzarmena sinatu zuen 2007an Aranzadi zientzia elkartearekin, azken honek herriko Natur Ondarearen azterketa egin zezan. Ikerketa Aranzadiko kide den Iñaki Sanz hernaniarrak eta Ibai Olariagak egin zuten UPV-EHUko irakasle Joserra Diezen zuzendaritzapean. Azterketa horren helburua zen herriko Natur Ondarearen diagnostikoa egin eta gero, udalari egoera azaldu, eta hobetzeko proposamenak luzatzea zen. Baita jendeari ezagutaraztea ere. Dibulgazio asmo horrekin, Kronikak iaz, zenbait txokori buruzko informazioa eman zuen Hernani ezagutzen atalean; hala nola, Antziola, Urruzuno eta Usoko errekena, eta Epele eta Ereñotzu basoena. Gaurtik aurrera, txoko gehiago ezagutzeko aukera izango da.
Begiak irekitzeko baliagarri
Azterketa 2007 urtearen amaieran eman zuten ezagutzera Sanzek eta Olariagak, eta Sanzek Kronikari azaldu dionaren arabera, udalerri mailan begiak irekitzeko balio izan du, eta pixkanaka ari zaio probetxua ateratzen. Izan ere, honen bidez garatuz doaz Hernaniko Ibilbide Sarea, Topagune Berdea eta aurten martxan jarritako azken proiektu bat: Urruzuno bailarako landare mehatxatuen mikroerreserba sarea proiektua.
Natur Ondarearen azterketari esker, Europa osotik zenbait espezie Hernanin bakarrik daudela jakin da eta sakonago aztertuz gero, gehiago ere izango direla uste du Sanzek.
Ikerketagatik saria
Udalsarea 21 erakundeak Tokiko Iraunkortasunerako Saria izeneko lehiaketa antolatu zuen iazko azaroan bigarren aldiz, eta Hernanik irabazi zuen. Udalsarea 21 EAE mailako erakundea da eta sare honen bidez koordinatzen dira udalerri bakoitzean garapen iraunkorraren alde egiten diren ahaleginak. Momentuan 197 udalerri daude bertan, baita Eusko Jaurlaritza, Gipuzkoa, Bizkaia eta Arabako Diputazioa, EUDEL eta IHOBE ere.
Hernaniko Natur Ondarea ikertzeagatik eta bertako mehatxatutako landare espezieentzako mikroerreserba sarea sortzen egindako lanagatik lortu zuen saria Hernanik. Sanz Barakaldoko BECen bertan izan zen proiektua aurkezten eta bere hitzetan, «sorpresa haundia izan zen, batez ere, finalera iritsi ziren beste herriak Busturia eta Gasteiz izan zirelako». Hemendik aurrera, proiektu berriak garatzeko prest daudela eta lanean jarraitzeko asmoa dutela dio Sanzek.