uztailak 16 izatearekin, Karmen eguna da eta Kaxkoan izen bera duen jaia ere bai. Gerra aurretik egiten den festa bada ere, urte askoan ospatu gabe egon ziren Karmenak Hernanin. Dena dela, 2003az geroztik, Kale Nagusiko eta Kardaberazko kaleetan batera ospatzen dituzte eta jende askok hartzen du parte. Hala, egun osorako egitarau ederra prestatu dute aurten ere.
Goiz goizetik festa
Herritarrak jaiegunean girotzen joateko goizeko 09:00etatik aurrera Diana izango da Kaxkoko kaleetan barrena. Mezara joan nahi duenak ere aukera izango du ordu berean. Haurrek ere izango dute goiza aprobetxatzeko modua. 10:00etatik 12:00ak arte jokoak izango dira udalekuetako begiraleek antolatuta.
Maria Jesus Iturbide alkate
Eguerdiko 12:00etan izango da jaien hasierako txupinazoa eta ondoren Alkatearen Makila eskuz aldatuko dute. Aurtengo Alkatea Kale Nagusiko, Rioja tabernako Maria Jesus Iturbide izango da. Bere esanetan «kamarera pribilegiatua» da izendapen honekin eta poz haundia eman dio bera aukeratu izanak. Hori dela eta, Alkatearen paperean behar bezala sartuta, ekitaldi guztietan parte hartzeko asmoa du Iturbidek. «Egun hori berezia da niretzat. Kontuan izan lana ez dudala sekula uzten, eta oraingoan festa giroan ibiliko naiz». Rioja tabernaren frentean, bigarren pisuan bizi da Iturbe eta bertako balkoian izango da makila eskuz aldatzea.
Omenaldia dendariei
Ondoren, omenaldia egingo zaie azken urteotan erretiroa hartuta denda itxi dutenei. Omendutakoak Eguzki perfumeriako Jesus Mari Mujika Arribillaga eta Arantxa Kortaberria Maestre izango dira; Anboto dendako Valentin Mandizabal Uribarren eta Mari Tere Urizar Agirre; eta Zabala okindegiko Rosario Zabala Irazu eta Juan Miguel Eizmendi Arruti. Omenaldia dantzari eta trikitilariekin egingo da eta amaitutakoan, trikitixak Kaxkoan zehar jarraituko du.
Bazkaria eta karta saioa
Eguerdiko 14:00ak aldera, lehendik txartela hartuta dutenek, bazkari herritarra izango dute Plaza Berrin. Tripa ondo bete ostean karta saioak izango dira Kardaberazen eta Kale Nagusian. Arratsaldeko 16:00etan hasiko dira eta bikoteak mistoak edota emakumezkoek osatuak izan beharko dira.
Arratsaldean jokoak
Gazte Asanbladak antolatuta
17:00etatik 19:00ak arte gaztelu puzgarriak egongo dira umeentzako Plaza Berrin eta 18:00etan, txokolate jatea. Ordu berean, Gazte Asanbladak antolatutako jokoak ere izango dira, hala nola, toka, igela... jendeari dei egin diote parte hartzeko eta horretarako Kale Nagusira joan behar da.
Ilunabarrean, 20:00ak inguruan, sari banaketak izango dira. Banaketekin amaitutakoan, sardinaz lepo jartzeko aukera izango da urteroko sardinjatea antolatu baitute Plaza Berrin. Gaueko 22:00ak arte jan ahal izango da sardina eta musika ere ez da faltako tarte horretan. Gauerdia iristearekin, Karmen jaiei datorren urtera arte agur esateko festa amaierako txupinazoa izango da.
Egitaraua
09:00 Diana Kaxkoko kaleetan barrena.
09:00 Meza.
10:00-12:00 Haurrentzako jokoak begiraleek antolatuta.
12:00 Jaien hasierako txupinazoa.
Makila eskuz aldatzea. Alkate berria Kale Nagusiko Maria Jesus Iturbide izango da (Rioja tabernakoa).
Omenaldia dantzari eta trikitilariekin azken urteotan erretiroa hartuta denda itxi dutenei.
Trikitixa Kaxkoan zehar.
14:00 Bazkari herritarra Plaza Berrin.
16:00 Karta saioak Kardaberazen eta Kale Nagusian. Bikote mistoak edota emakumezkoek osatuak.
17:00-19:00 Gaztelu puzgarriak Plaza Berrin.
18:00 Haurrentzako txokolate jatea Plaza Berrin eta jokoak Kale Nagusian Gazte Asanbladak antolatuta.
20:00 Sari banaketak.
20:00-22:00 Sardinjatea Plaza Berrin musikaz lagunduta.
Ondoren Festa amaierako txupinazoa.