Aida! Bigarren urtez jarraian

Iazko jendearen emana ikusita idi dema ohitura bi­hurtzeko bidean da Hernaniko San Joanetan, eta aurten ere zaleek gozatua hartzeko aukera izango dute, gaur, larunbata, goizeko 11:30etan. Inaxio Telleriaren idi parea ariko da batetik eta Iñaki Intxaurbu­rurena bestetik, 1.200 kiloko harriarekin zeinek plaza gehia­go egingo. Telle­riaren idi pa­rea zail­duagoa iza­ki, 200 kiloko gainkarga izango dute aurten, iaz beza­laxe.

Iaz Telleria nagusi 49 plazarekin Iazko deman, 49 plaza egin zituen Telleriaren idi pareak eta 31 Intxaurbururenak. La­sar­tearraren idi parea gehiago ibilia izaki, pentsa zitekeena gertatu zen, baina Intxaur­buruk erakutsi nahiko du urtebete ez dela alperrik pasa. Seguru, bihar gauzak estuago izango direla!

Ohitura bueltan, urte askoren ondoren
Orain hurrengo, auskalo noiz egin ziren idi demak Herna­niko Kaxkoan, jendearen me­mo­riatik borratua dago be­hintzat. Hernanin idi pareak, itzaiak eta afizioa badira eta herriko festa nagusiek idi-dema bat eskatzen zutela iri­tzita ekin zioten iaz anto­latzeari. Joan den urtean jendetza bildu zen idiek plazan zenbat plaza egiten zituzten ikustera.

Elur Txorik antolatuta
Baserritarren eguneko eki­tal­dietako asko bezala, Elur Txori elkartearen eskutik an­tolatu da aurtengo dema ere, okasioak eskatzen duen mo­duan herriko plaza nagusian, eta eguraldiak nahi badu, jende asko espero da gaurkorako.