ZORTZI entsaiorekin soilik, baina ondo landutako entsaioekin, 5-12 urte bitarteko 74 neska-mutilek dantzarako duten abilezia erakutsiko dute gaur, haurren aurreskuan. Aurreskua, urtero bezala, 17:00etan hasiko da Plazan. Aurreko urteetan baino haur gutxiagok hartuko dute parte, baina aurten ere, ikuskizun bikainaz gozatzeko aukera izango du gerturatzen den orok.
Dantza saioaren
egituraketa
Hasteko, gaztetxoek soka bat egingo dute eta plazari buelta emango diote. Ondoren, aurrenekoek, hau da, aurreskua dantzatzen dutenek, eta azkenekoek, atzeskua dantzatzen dutenek, sokatik atera eta desafioa egingo diote elkarri, dantzan. Segidan, arku bat egin eta haurrak azpitik igaroko dira.
Horren ostean, mutilek banan-banan alpargata dantza egingo dute. Norberak bere estiloan. Gero, aurreskua eta atzeskua dantzatuko duten launa mutikok beren bikoteak hartu eta plaza erdira eramango dituzte. Bertan, agurra dantzatuko diete.
Amaitzean, hasieran osatutako zinta egingo dute berriro, eta mutilek zortzikoa dantzatuko diete bikoteei. Behin bikoteak osatuta daudela, arin arina eta fandangoa dantzatuko dute denek batera.
Jarraian, Plaza atzean utzi eta haurrek kale bueltari ekingo diote geldialdiak eginez. Bakoitzean zortzikoa, fandangoa eta arin arina dantzatuko dituzte. Buelta amaitu ondoren, hasitako lekura, Plazara itzuliko dira. Bertan, dantzaldiari amaiera emango diote. Eta indarrak berreskuratzeko merienda zain izango dute Udaletxeko arkupetan.