Atzo goizean Eduardo Antonio Puelles García Polizia Nazionaleko Inspektorea hil zuten Arrigorriagan izandako atentatuan. Atentatua salatzeko, Hernaniko PSE-EE, PNV, Alkarbide, EB eta PPk idatzi bateratu bat egin zuten eta Batzar Nagusietako Bozeramaile Batzordeak egindako gaitzespen adierazpenarekin bat egin zuten. Kontzentrazioa gaur izango da, eguerdiko 12:00etan, udaletxeko arkupetan.
Haserrea eta gaitzespena
Gipuzkoako Batzar Nagusietako idatzian, euren haserrea eta gaitzespenik «tinkoena» adierazten dute hilketaren aurrean, eta ETA erakundeari «berehala eta baldintzarik gabe» desegiteko eskatzen diote.
Era berean, dei egiten diote gizarteari hilketaren aurrean erantzun «tinko eta lasaia» emateko, hilketa salatzeko antolatuko diren ekitaldi, manifestazio eta kontzentrazioetan parte hartuz.
Idatzian dio, «hilketa hau eta ETAk burutzen dituen atentatu guztiak, giza eskubideen erabateko urraketa dira» eta herritar gehienen artean «mina eta bazterketa» eragiten dute. Azkenik, «babesa, laguntza eta maitasuna» adierazi dizkiote familiari, lagunei eta Polizia Nazionaleko lankideei.