azken 26 urteotan bezala, aurten ere sagardo lehiaketa antolatu du Txantxangorri elkarteak. Lehiaketako eguna irailaren 25a izango da eta afaria egingo da. Afarian, gehienez, 156 pertsonek hartu ahal izango dute parte eta izena emateko epea bazkideentzako, gaur irekiko da. Irailaren 15era arte izango dute apuntatzeko aukera. Afaltzera joango den giltzadun bazkideak bi lagun apuntatu ditzake. Gainontzekoak irailaren 16tik aurrera eman ahalko dute izena lekua bete arte. Izen ematea elkarteko bulegoan izango da eta momentuan ordaindu behar da, ordainagiria bertan jasoz. Afaria, beraz, hilaren azken ostiralean izango da Txantxangorri elkarteko kanpoko aldean, arratsaldeko 20:00etan.
Menu ederra
Afarira joan nahi duenak 25 euro ordainduta honako menuaz gozatzeko aukera izango du: arrautza egosia, bakailua Bizkaiko erara edo saltsa berdean, bertako sahieskia, Urbasako gazta, kafea, kopa eta puroa. Mahaien antolaketari dagokionez, 16 mahai izango dira, 10 pertsonako 14 mahai eta 8 pertsonako 2 mahai.
15 sagardo lehiaketan
Txapelketa hasita, afarira berandu iristen direnek ez dute puntuaketan parte hartzerik izango. Sagardo bakoitza puntuatuko da, 5 gutxienez eta 10 gehienez. Sailkapenaren berri txapelketa bukatzean emango da.
Lehiaketan guztira 15 sagardok hartuko dute parte. Hernanitik 7 izango dira: Elorrabi, Iparragirre, Otsua-enea, Olaizola, Itsasburu, Rufino eta Zelaia. Astigarragatik 6: Astarbe, Petritegi, Bereziartua, Herrero, Oyarbide eta Lizeaga. Donostiatik, berriz, Barkaiztegi, eta Zubietatik Astiazaran.
Sagardoak lehiaketara 15 tandatan aterako dira. Tanda bakoitzean lau sagardo ezberdin aterako dira eta sagardo bakoitza lau mahaitarako izango da. Hala, txandatzen joango dira sagardoak. Elkartekoek jakinarazi dutenez, modu horretan eginda, emaitza fidagarriagoak lortzen dira mahai guztietan sagardo berdina batera aterata baino.
Sariak sagardogileentzat eta mahaikideentzat
Sariak lehenengo lau sagardogileentzat izango dira. Irabazleak txapela izango du eta lehenengo laurei trofeoak emango zaizkie. Lehenengo hiru sagardo irabazleen edo azkeneko hiruren puntuaketara gehien hurbildu diren mahaikideek ere izango dituzte sariak. Sailkapen honetan kontuan izango da ere sagardo hoberenei eta txarrenei eman dizkieten 10ak eta 5ak zenbat izan diren.
Elkarteak lehiaketa honetan aurkezten diren sagardoen maila mantendu, edota posible izanez gero, igotzeko helburua du, eta horretarako, azken urteetan erabilitako formula mantenduko du aurten ere. Horrek esan nahi du, lehiaketan azkenak geratzen diren bi sagardoak ordezkatuak izango direla parte hartu nahi duten beste birengatik. Datorren urtean beraz, beste bi sagardo ezberdin izango dira lehiaketan.
2008ko irabazlea
Iñaki Irigoyen (Herrero)
Joan den urteko irabazlea Iñaki Irigoyen Herrero sagardotegikoa izan zen. Aurten, lehiaketako sailkapenean aurrenak geratzen diren sagardogileek sagardo hori erosteko aukera izango dute lokal sozialerako.