FINALERARAINO iritsi eta txapela etxera ezin ekartzearen penarekin itzuli ziren atzo Hernaniko pelotariak Atano III frontoitik. Hala ere, txapelketa ondo jokatu, eta eta finaleraino iristea ez da meritu makala. Hernanik beste urte batez erakutsi du onenen artean dagoela.
Kadete eta seniorretan galdu, jubeniletan irabazi
Aurreikuspenak beteta, Hernanik kadeteetako partidua galdu egin zuen, 22-4 eta jubeniletakoa irabazi, 22-6. Senior mailako partidua espero zen berdinduena, baina azkenean Hernanik 22-12 galdu zuen.
Kadete mailan, Lujanbio eta Elorza atera ziren Hernanitik, eta Bergaratik, Gallastegi eta Rezusta. Rezusta maila haundiko pelotaria da eta espero bezala berak dominatu zuen partidua. Bergarakoek tanto mordoxka egin zituzten hasieratik eta 17 eta 0 jarri ziren aurretik. Hernaniarrek ezin izan zioten partiduari buelta eman.
Jubenil mailan, Hernanik irabazi egin zuen, espero bezala. Arrieta eta Aizpitarte II Hernaniko bikoteak Bergarako Rezusta eta Irizar baino gehiago zirela erakutsi zuten, eta uste baino errazago eskuratu zuten partidua.
Ordura arteko emaitzak ikusita senior mailako partiduak sortu zuen ikusmin haundiena. Azken partidua asko gogortu zen hasieratik eta Ojuel eta Gorrotxategik irabazteko aukerarik izan zuten arren azkenean Bergarakoek eskuratu zuten txapela.
Azpimarratzeko da baita ere bai Hernani eta bai Bergarako afizioak frontoian jarri zuen giroa. Pelotariek babes haundia izan zuten.
Bestalde, jokalariek, Jon Ezeiza taldekidea gogoan izan zuten atzoko partiduan.