HERRIKO hainbat guraso elkartu eta herrian Umeen Etxea sortzea bultzatzeko lanean hasi da. Guraso talde honek azaldu du Marigorri haurtzaindegi-ludoteka uztailaren 31n itxiko dutela eta pena haundiz hartu dutela berria. Azaldu dute haurtzaindegiak 0-8 haurrentzako zerbitzu ugari eskaintzen dituela: haurtzaindegia, ludoteka, umeak ikastolara eraman edo ekarri, ordukako egonaldiak, urte osoan zehar irekita izaten dela, ordutegi zabala duela, edozein garaitan plaza hartzeko aukera izaten dela, eta gurasoen beharretara egokitzen dela. Hernanin aukera hauek zentro honek bakarrik ematen dituela azpimarratu dute. Zerbitzua ixteak hutsune haundia utziko duela nabarmendu dute: «zer egingo dugu orain behar hau dugun hainbat eta hainbat gurasok? Nora eramango ditugu haurrak? Lana egiteari utzi behar al diogu? Zein da irtenbidea?». Haurtzaindegi zerbitzuaz gain beste behar batzuk ere aipatu dituzte, esaterako, umeei titia emateko edo elikatzeko gela aproposa, kerik gabekoa, eta umeekin egoteko aterpe edo jolasteko gela.
Umeen Etxea sortzea bultzatzeko bilera
Gai honen inguruan kezkatutako gurasoek guraso elkartea sortu dute, Haur Etxea sortzea sustatzeko, Marigorri Haurtzaindegiak emango lituzkeen zerbitzuak izaten jarraitzeko, besteak beste. Uste dute 20.000 biztanleko herri batek merezi duela horrelako zerbitzua.
Gai honi buruz hitz egiteko udalarekin bildu direla ere azaldu dute, «udalaren laguntza beharrezkoa denez, berarengana jo genuen, baina haurreskola bat herrian badagoenez lagundu ezin digutela esan digute. Guk berriz ezin dugu erantzun horrekin konformatu. Gure haurrek ez al dute merezi umeen etxe bat gure herriko zaharrek duten bezala? Arazo pertsonala ala soziala dela uste duzue? Zer deritzozue?».
Eskaera honekin ados daudenekin bilera deitu dute ekainaren 17rako. Arratsaldeko 19:00etan egin dute hitzordua Gudarien plazan.