Graffiti, break dance, scratch, DJ tailerrak eta abar gaur, egun osoan zehar, Hip Hop Egunean

hip Hop Eguna ospatuko da gaur Hernanin, bosgarren urtez. Goizean tailer mor­doska izango dira, era askotakoak, eta bazka­lostean goizean ikasitakoak erakus­teko aukera izango da. Jaialdia Tilosetan izango da, goizeko 11:00etatik aurrera (euria egingo balu, Biteri kultur etxean egingo litza­teke, arratsal­dez bakarrik) .

Goizean ikasi
Goizean era guztietako taile­rrak izango dira, dantzan eta kantuan ikasteko. Besteak beste, graffiti tailerra, scratch eta DJ tailerra eta break dance tailerra izango dira. Graffiti tailerrean jendeak graffitiaren teknikak ezagutu eta praktikatzeko aukera izan­go du. Monitore bat izango da laguntzeko eta beharrezko materiala ere bai: spraiak, pa­ne­lak eta abar. Scratch eta DJ tailerra Scratch eta DJ tailerrean musi­ka jartzeko, nahasteko eta scrat­chak egiteko teknikak irakatsiko dituzte. Horretara­ko beharrezko materiala izango da: bi technics plato, musika nahasteko mahaia, soi­nu ekipoa eta abar. Eta kategoriko maisua izango da bertan: Esne Beltza, Fermin Muguruza eta Selektah Kolek­ti­boko partaidea den DZ ariko da maisu lanetan.

Break dance tailerra
Break dance tailerrean gorpu­tzaren espresioa musika eta dantzaren bidez lantzeko tek­nikak irakatsiko dituzte. Ho­rre­tarako ere ez da materialik faltako: sintasola, soinu eki­poa, musika jarriko duen DJa eta abar.

Bazkaria Tilosetan
Eguerdirako jendea gosetua izango da eta atsedenaldia egingo dute bazkaltzeko. On­doren graffitiak margotzen jarraituko dute eta musika izango da girotzeko.

Arratsaldean jaialdia
Arratsaldean, goizean ikasita­koak erakusteko aukera izango da. 17:00etan hasita DZren eskutik scratch era­kustaldia izango da.

Abeslari gazteen tartea
Antolatzaileen esanetan, asko dira Euskal Herrian rap musikaren bidetik abesten hasi diren gazteak, «gutxi dira ordea, jendearen aurrean eta baldintza egokietan, beraiek konposatutako abes­tiak aur­kez­teko dituzten aukerak». Hain zuzen, horiei zuzenduta dago arratsaldeko jaialdia, «gustora aritzeko aukera eman nahi diegu». Jaialdiaren ondoren, Aritz Sound System-en eta DZren musikarekin lagunduta, Break dantzarien erakustaldia izango da.

Hip Hop-a
Hip Hop-a 80garren hamar­kadan Amerikako Estatu Batuetako auzo txiroetan sor­tua da. Ideiak eta sen­ti­men­duak adierazteko modu bat da eta horretarako hain­bat balia­bide ditu: raparen bidez, ahoz­ko espresioa lan­tzen da, break dantzaren bi­dez, gor­putz espresioa, eta graffitien bidez, ideiak eta sentimenduak irudi bihur­tzen dira.