ATZO arratsaldean agerraldi masiboa egiteko deia egin zuen Hernaniko Ezker Abertzaleak, Marian Beitialarrangoitia Alkatearen kontrako epaia salatzeko. Iruñean izandako ekitaldi politiko batean esandakoengatik, terrorismoa goratzea leporatu dio Auzitegi Nazionalak, eta urte beteko kartzela zigorra eta zazpi urteko inhabilitazioa ezarri dizkio.
«Epaia politikoa»
Agerraldian adierazi zuten Alkatearen kontrako epaia politikoa dela eta Hernaniko Ezker Abertzalea ez duela sorpresaz harrapatu, «intentzioa garbia da Hernaniko Ezker Abertzalea udaleetik kanporatzea». Auzitegi Nazionalari zilegitasunik ematen ez diotela salatu zuten, «Marianek egiten duen lana epai dezaketen bakarrak hernaniarrak baitira».
«Maitasun sentimendu bat adierazteagatik Alkatea eta harekin batean herri honen gehiengoa» epaituko dutela ere nabarmendu nahi izan zuten, eta horrekin batera eskertu zuten, «hernaniarrek emandako berotasuna». Udal ordezkari politikoei eskatu zieten «ez dezatela epai hau beraien interes politikoa eta partidisten mesedetan erabiltzeko tentaldian erori».
Bukatzeko, epaia Euskal Herria eta Espainiako Estatuaren arteko gatazka politikoaren barruan kokatu zuten, eta adierazi zuten «elkarrizketa eta negoziazioa direla gatazka gainditzeko modu bakarra».