JAVIER Mendizabal Tolarieta baserrian jaio zen orain dela 67 urte; hil honen 16an 68 urte egingo ditu. Maritxu Erroizenea berriz, Fagollagan jaio eta Martutenen bizi ondoren, Tolarietara ezkondu zen. Festetan «ondo pasatzeko» asmoa dute; eta Maritxuk aitortu duenez «pasatzeko desiatzen nago, nerbiosa jartzen bainaiz». Gaur eta bihar Arriatsun izango dira. Festetan gehien gustatzen zaiena biei, abere dema da. Demazaleak dira eta Astigarragara, Oiartzunera eta Ergobira joaten dira, besteak beste, urtero.
Javier Arriatsun ibilia
Javier ere, auzoko gehienak bezala, Arriatsun ibilia da, «huraxe zen gure unibertsitatea». 8 eta 12 urte bitartean joan omen zen eskolara eta zein oroitzapen dituen galdetuta, halaxe erantzun du: «Belarrondoko batzuk eta... premia ere igual izango genuen; goizean Cara al Sol kantatu eskolara sartzeko eta... Maistra kastellanoa genuen, Señorita Dionisi, ez genuen asko ikasi; gogorra zen, ona zen erakusten, asko zekien, baina gogorra zen. Gero Señorita Pura etorri zen, hura motelagoa-edo zen, bestea bezalakoa ez behintzat».
Eskolara joan
eta baratzan gustora
Javier akordatzen da baratza ere egiten zutela Arriatsun, eta kazkarrekoak jasotzen zituelako edo, baina «hantxe aritzen ginen, porruak landatzen eta; gu gustora han, eskolan baino nahiago».
Auzoa gutxi aldatu
Maritxu eta Javierren ustez, auzoa ez da gehiegi aldatu; etxe berri batzuk eta bai, baina jende gehiena auzokoa da.
Sagardoa ia etxero
Sagardotegiei buruz galdetuta, garai batean ia etxero sagardoa izaten zela erantzun dute. Javierrek gogoratzen du Ostiral Santu Egunean, meza ondoren, Argindegira joan eta basoka sagardo ematen zietela, «neska egoten zen kupel ondoan, hark betetzen zuen basoa eta hark ematen zizun. Gero bola edo tokan jokatu eta galtzen zuenak haiek pagatu behar izaten zituen».
Javierrek ez omen zuen ezagutu, baina etxean entzun izan omen du, beren aitona baratzera joan, artajorrara, eta martxa egin izana, «astebete Pardiola sagardotegira eta hantxe pasa astebete, eta andrea joaten zitzaion arropa garbiarekin».