Ikasturte honetan ere, aurrekoetan bezala, Ingurumenaren inguruko lanketak egiten aritu dira herriko ikastetxeetan. Ingurumenari buruzko Hezkuntza Programa Lehen Hezkuntzako ikasleei zuzendua dago, 4, 5 eta 6garren mailakoei, eta maila bakoitzean gai bat jorratzen dute.
Hondakinak,
landareak eta ura
Lehen Hezkuntzako 4garren mailako ikasleek hondakinen gaia jorratu dute, bereziki honakoak egin dituzte: zabor poltsen azterketa tailerra egin dute; udalerriko egoera aztertu dute; eta Urnietan dagoen ontziak sailkatzeko planta ikustera joan dira, besteak beste.
5garren mailakoek berriz, landaretza izan dute aztergai, eta horretarako, besteak beste, honakoak egin dituzte: herriko parkeetako zuhaitzak ezagutu dituzte; eta paperaren inguruko tailerrak egin dituzte, papera birziklatuz eta enkuadernatuz. Urnietako Arizmendi landare mintegia bisitatzera ere joan dira.
Ura izan dute aztergai 6garren mailakoek. Horretarako, erreka baten egoera aztertu dute; ura eta kararriaren arteko higadura prozesua ezagutu dute; eta Añarbeko Edateko Uren Araztegira joan dira.
Hondakinak eta Kontsumoa
Eskola Agenda 21en
Era berean, Hernaniko Lehen Hezkuntzako ikasleek Hondakinak eta Kontsumoa gaiak jorratu dituzte eskolan, Eskola Agenda 21 proiektuaren barruan. Proiektu honen berri ere emango dute Biteriko erakusketan.
Erakusketa Biteri kultur etxean egon da aste honetan, eta datorren asteazkenera arte bertan izango da ikusi nahi izanez gero, arratsaldeko 17:00etatik 19:00etara.