AUKERA ezazu, aukera gehiago eta hobeak izan ditzazun matrikulazio kanpaina aurkeztu zuten atzo, Biteri kultur etxean, Buruntzaldeko ordezkariek. Bertan izan ziren Idurre Lukas Euskara eta Kultura Zinegotzia, Urnietako Euskara Teknikaria, Imanol Elosegi Urnietako Salesiar ikastetxeko ordezkaria, Manu Agirre Andoaingo La Salle Berrozpe ikastetxeko ordezkaria, eta Xanti Aranburu Aita Larramendi Andoaingo ikastetxeko ordezkaria. Buruntzaldeko Udalek, 2002garren urtean sinatu zuten euskarazko egitasmoak elkarlanean egiteko hitzarmena, eta kanpaina hau hitzarmen horren ondorioa da. Kanpaina honen helburua da, 2008-2009 ikasturtean euskararen egoera hobetzea, batez ere Derrigorrezko Bigarren Hezkuntzaren Ondorengoan.
Hizkuntza ereduen
desoreka
Urnietako Euskara teknikariak adierazi zuenez, kanpaina hau egitearen arrazoietariko bat da gaur egun hizkuntza ereduetan dagoen desoreka: «DBHren ondorengo mailetan hizkuntz desoreka haundia dago. DBHn eta batxilergoan, ikasketak D ereduan egiteko aukera %80koa da, Erdi Mailako eta Goi Mailako zikloetan ordea %35ekoa».
Euskera teknikariak esan zuenaren arabera, egitasmoak aurrera egiteko beste arrazoietako bat da lan munduan euskerak geroz eta presentzia haundiagoa duela: «Buruntzaldean gaur egun 11 enpresa daude euskera plana martxan dutenak, horietako 4 Hernanin. Aurrerapauso haundia eman dugu, baina presentzia hori haunditu nahi dugu. Honez gain, baita ere nahi dugu ikasleek praktikak euskaraz egiteko baldintzak izatea».
Atzo hasi zen matrikulazio kanpaina
Heziketa zikloetako matrikulazio kanpaina atzo hasi zen eta 12ra arte izango da zabalik. Hori aprobetxatuz, kanpainarako egin duten hiruorrikoa banatuko dute ikasleen artean. Bertan ikasketak euskeraz egiteko dagoen aukera azaltzen da, bai batxilergoan eta baita zikloetan ere.
Erdi Mailako zikloak euskaraz Buruntzaldeko lau ikastetxeetan egin daitezke, eta 10 ziklo daude. Goi Mailako zikloak berriz 7 ikastetxetan egin daitezke, eta 18 zikloetan dago aukera.
Zikloez gain, badago beste aukera bat, goi mailako sarbide froga izenekoa. Froga hau Erdi Mailako zikloetatik goi mailako zikloetara pasatzeko egiten da, eta euskaraz ere egin daiteke. Prentsaurrean adierazi zutenez, aurten hiruorrikoan sartzeko aukerarik izan ez duten arren, datorren urtekoan sartzeko asmoa dute.
1.000 hiruorriko banatuko dituzte
Buruntzaldean
Hiruorrikoaren mila ale argitaratu dituzte Buruntzaldeko 6 udalerrietan banatzeko. Informazioa emateko hiruorrikoak DBH eta Batxilergoa amaitzen dutenen artean banatuko dituzte, eta baita Erdi Mailako eta Goi Mailako zikloei begira dauden ikasleen artean ere.