iñaki arratibelek, EAko zinegotziak, kezka adierazi du Hernaniko hirigintza planeamentuaren inguruan, Kronikara bidalitako prentsa ohar baten bidez. Arratibelek dio azken hamar hilabeteetan Arau Subsidiarioen inguruko testuari buruzko berririk ez dutela: «Arau Subsidiarioen azken fasea osatzeko akordio bat onartu zenetik, 2008ko uztailetik, hamar hilabete pasa dira. Hain zuzen ere, azken hamar hilabete hauetan ez dugu ia berririk jaso, idatzian egin diren progesioen inguruan».
«Akordioan esaten zen hilabeteroko jarraipena
egingo zela»
EAko zinegotziak adierazitakoaren arabera akordioak zioen hilabetero egiten ziren progresioen berri emango zela: «akordioen puntuetako batek zioen jarraipen komisio bat osatuko zela, eta idatzian egiten ziren progresioen berri hilabetero emango zela. Esan beharra daukat jarraipena egiteko osatutako komisioa behin bakarrik bildu dela, eta modu honetara, hamar hilabete pasa ondoren, ez dakigu zein egoeratan dagoen testu berriaren erredakzioa».
«Hirigintza politika
blokeatuta dago»
Zinegotzi nazionalistak adierazitakoaren arabera, gaur egun Hernaniko Hirigintza politika blokeatuta dago, eta hori kezkagarria da: «Akordioaren alde azaldu ziren alderdi politikoak gaur egun zalantzan jartzen dute babes hori, eta Gobernu Taldeak ez du proiektua aurrera ateratzeko garantiarik. Testua idazteko bi urte galdu dira, eta askok uste dugu legislatura bukatuko dela hirigintza plangintza nola geratuko den adierazten duen testua idatzi gabe. Nire ustez sekretismo honek herritarrak defentsarik gabe uzten ditu, eta esango nuke hirigintza txiringitoko urterik txarrenetara bueltatzen ari garela».
Jarraipen Komisioari
dei egin diete
Arratibelek jarraipena egiten duen komisioari dei egin dio, testua dagoen fasearen berri emateko, eta baita Gobernu taldeak testua onartzeko izango duen babesaren berri emateko ere.