JOCC Zikuñako Ama zikloturista taldeak antolatuta, hitzaldia izango da ostegunean, Biterin. Manu Zubillaga Hernaniko doktoreak bizikletaren neurri egokietaz, eta posizioak sortutako lesioei buruzko hitzaldia emango du. Gainkargak, lesioak eta bizikleta eta txirrindulariaren azterketa zehatza izango dira aztertuko dituzten gaietako batzuk. Hitzaldia, maiatzaren 28an, ostegunean, arratsaldeko 19:30etan izango da, Biterin.
Haurrekin
ginkana larunbatean
Bestalde, larunbatean, haurrekin ginkana antolatu zuen zikloturista taldeak, eskola kirolaren barruan. Guztira 50 bat neska mutil animatu ziren. Inmaculada ikastetxeko ikasleak salbu, herriko beste ikastetxeetako ikasleak izan ziren. Izan ere, Inmaculadakoak eskolako jaialdia izan zuten larunbatean.
Ginkanan kirol ezberdinak uztartu zituzten: saskibaloia, txirrinda, futbola bizikletaz, trialsin zirkuitoa, pedalei eragin gabeko lasterketa, eta abar. Helburua, abiadura baino, oreka eta kontrola lantzea izan ziren. Neska-mutilek primeran pasa zuten.
Zikloturista taldeak eskola kiroleko monitoreen laguntza eskertu nahi izan du, jokoak antolatzeko lana asko erraztu zutelako.