Aberri Egunean Irunetik Hendaiara egingo den martxan parte hartzeko deia luzatu du herritar talde batek

Hernaniko zenbait herritarrek, prentsa ohar bidez, jakinarazi dute bat egiten dutela Nazio Eztabaida Guneak, Aberri Eguna dela eta, apirilaren 12an deitu duen martxarekin; eta bide batez, herritarrei dei egiten diete parte har dezaten. Prentsa oharrean adierazi dute aldaketarako garaia dela eta horretarako indarrak batu behar direla: «Aldaketa garaia da, zapalkuntza egoera gainditu eta burujabetzarako bidean indarrak batzeko garaia da. Beraz, Irun-Hendaia artean egingo den martxan parte hartzeko deia luzatzen dugu. Honez gain, gure nortasuna irudikatzen duen, eta azken aldian hainbeste eraso jasaten ari den Ikurriña balkoietan jartzeko deia ere luzatzen diegu herritarrei».