MANIFESTAZIOA izan zen atzo herrian azkenaldian izan diren miaketak eta Iraitz Santakruzen atxiloketa salatzeko. Iraitz askatu lemapean herritar ugarik egin zuen bat deialdiarekin. Aurrerantzean egunero egingo dituzte manifestazioak, 20:00etan, Gudarien plazatik abiatuta.
Iraitz Santakruz inkomunikatua
Iraitz Santakruz ostegun arratsaldean atxilotu zuen Ertzaintzak, Lizeaga kalean, bere etxe inguruan. Atzo manifestazio aurrean jakinarazi zutenez, Iraitz Santakruz Oiartzungo Ertzain-etxean dago inkomunikatuta, eta mediku baten bisita izan du orduro. Atxilotua Madrilera eramatekoa dutela ere jakinarazi dute, Audientzia Nazionalera. Atzo aipatu zuten, baita ere, azken egunetan Hernanin 4 miaketa izan direla; tartean Iraitz Santakruzen etxea miatu zuten, 23:00etatik aurrera, atxilotua bertan zela. Eta azkenik, salatu zuten Ertzaintzak egun horietan izan duen «inpunitatea eta harrotasuna».