Ereñotzu eta Martindegin ere ibili ziren santaeskean

Santa Ageda bezpera izan zen asteazkenean, eta urteetako usadioari jarraituta, makila hartu eta herrian barrena ibili ziren koadrila ezberdinak. Ereñotzun lagun talde ederra elkartu zen, gazte eta helduz osatutakoa. Pagoagan hasi zuten ibilbidea, eta handik Pikoaga, Ugaldetxo, Agirreberri, Tximistane, Ubarroto, Abilats, Latxe, Ereñotzu, Fagollaga, Lastaola eta Epelen barrena ibili ziren. Azkeneko geldialdia Larre-gain sagardotegian egin zuten, eta bertan afaldu zuten. Hernani eta Astigarragako AEK euskaltegiko ikasle eta irakasleak, aldiz, Martindegin barrena ibili ziren, kantuan aritu ondoren, eztarriak goxatzeko Oialume-zar sagardotegira joan ziren afaltzera.