JOAN den asteburuan Urretxun kadete mailako 27garren txirrindulari txapelketa izan zen eta 15 urteko Xabier Perez Garmendia hernaniarra izan zen txapeldun. Xabier Perezek Andoaingo taldearekin hartu zuen parte, beste bi lagunekin batean.
Bost lagun ihesaldian
Lasterketan, Azkoititik bueltan zetozela, bost laguneko talde batek ihes egin zuen, tartean zen Xabier. Pelotoiari minutuko tartea aterata, Ormaiztegitik Urretxurako bueltan, denbora tartea mantendu zuten, Eitza gainaren hasierara arte. Igoera hasiera honetan, Xabierrek erasoa jo eta bakarrik geratu zen. Urretxuko helmugan 20 segunduko tartea atera zion bigarren txirrindulariari.
Denboraldi ona
Denboraldi ona egiten ari da Xabier Perez. Zarautzeko proban 5garren geratu zen, Azpeitian 4garren eta Urretxun txapeldun.
Xabat Otxotorena Zornotzan
Extremadura taldean dabilen Xabat Otxotorena txirrindulari hernaniarra bihar Zornotzako Udaberriko Klasikan ariko da. Otxotorena martxa onean dabil eta ahalik eta posturik txukunena egiten saiatuko da.