ASTE santuko Ostiral Santuan egiten den bezala Santa Barbararaino gurutzbidea egin zuten herritar ugarik herenegun, Plazatik abiatuta. Jesukristoren gurutzbidea gogoratu zuten Santa Barbara bidean dauden 14 gurutzeetan geldialdiak eginda, otoitz eta gogoeta eginez. Luis Aperribai bikarioak gidatu zuen gurutzbidea eta geldialdi bakoitzean zenbait gogoeta egin zituen. Besteak beste, esan zuen Jesukristok momenturik gogorrenetan ere Jainkoarenganako fedea izan zuela, beti izan zuela itxaropena Jainkoak egoera zailenetik ere onik ateratzen lagunduko ziola, nahiz Jesus gurutzera eraman zutenek berak etsitzea nahi izan. Fede horren garrantzia azpimarratu zuen.
Gaur, Pazko Igandea
Gaur, Pazko Igandea, elizkizunak izango dira parrokia ezberdinetan. Goizeko 09:30etan Agustinetan; 10:30etan, Ereñotzuko San Antonio parrokian; goizeko 11:00etan, San Joan Bataiatzailearen parrokian; eta eguerdiko 12:00etan Floridako San Jose Obrero parrokian.