Atzo hedabideek eta informazio agentziek jakitera eman zuten Unai Fano hernaniarra atxilotu egin zutela, eta Kronikan ere hala agertu da. Ondoren jakin ahal izan denez, Unai Fano ez dute atxilotu. Horrekin batera, jakin ahal izan da astelehen gauean Polizia Nazionalak bere Hernaniko etxea miatu egin zuela, baina Unai Fano ez zutela bertan aurkitu.
Hedabideek zabaldu dutenez, Unai Fano atxilotzeko agindua eman du Baltasar Garzon epaileak, `erakunde terroristako kide izatea` eta `delitua errepikatzea leporatuta, Batasunaren izenean aritu izanagatik, hau legez kanpo egonda`. Antza denez, epaileak frogatzat erabili du joan den larunbatean Iruñean Loiolako negoziazioei buruzko hitzaldian parte hartu izana, Pernando Barrena eta Patxi Urrutiarekin batera. Azken bi hauek atxilotuak izan ziren astelehenean.