Olentzerok Hernanira ere egin zuen bisita

Astelehenean etortzekoa zela bazekiten Hernaniko neska-mutil guztiek eta aurten ere ez du hutsik egin Olentzerok. Auzo desberdinetan eta baserriz baserri ibili zen lehenengo, eta jenderik gehien Kaxkoan bildu zuen ilunabarrean. Arratsaldeko 18:00ak inguruan iritsi zen Tellerigaindik behera eta Andre Kalea eta Kale Nagusian barrena eman zuen buelta, Plazan geratu arte. Plazan umeek opariak eskatu zizkioten, etxera joan aurretik. Urteroko moduan, Ttarla dantza taldeko dantzari gazteek jarraitu zioten Olentzerori eta astoa ere ekarri zuen opariz betea.