PSE-EEk bere egoitzaren kontrako erasoa salatu du

Hernaniko PSE-EEk asteazken gauean bere egoitzaren kontra egindako erasoa salatu du. Salaketa Hernaniko udal bozeramaile den Jose Ramon Chicak egin du, Hernaniko sozialisten izenean. Bere hitzetan, ´berriz ere, herri honen ahotsa isilarazi nahi izan dute, herriaren ordezkariak erasotuz`. Prentsa ohar baten bidez, jakinarazi dute ´ez dela lehenengo aldia, eta ez dela azkena izango, sozialistak ikaratu nahi izango dituztena`, izan ere, ´bada jendea eroso sentitzen dena gatazkarekin eta ez du herritarren arteko elkarbizitza baketsuaren alde egiten`. Udal Bozeramaile Batzordeak erasoa salatu du Hernaniko udal bozeramaile batzordeak ere salatu du erasoa. Mozio bat, Alderdi Sozialista, EAJ, EA, EB eta Alderdi Popularraren botoekin onartu da. EAE-ANV alderdia abstenitu egin da eta beste mozio bat aurkeztu du. PSE-EEk aurkeztutako mozioan, erasoa salatzeaz gain, babesa eta elkartasuna adierazi diote Alderdi Sozialistari eta dei egin diote MLNVari, ´kasu egin diezaion Hernanik duen bake nahiari eta ez dezan erabili indarkeria bere ideiak ezartzeko`. Bestalde, esan dute ´elkarrizketa eta legeak betetzea` direla ´terrorismoaren arazoari aurre egiteko bide bakarra`. Azkenik, mozioan, dei egin diete Hernaniko herritarrei, alderdi politiko baten egoitzaren kontra egindako eraso hau salatu dezaten, ´egun beharrezkoa baita kalera ateratzea, biolentziaren aurka eta bakearen alde azaltzeko`. EAE-ANVren mozioa EAE-ANV alderdiak beste mozio bat aurkeztu du eta hau ere onartu egin da. Mozioa EAE-ANV eta EBren botoekin onartu da; EAJ abstenitu egin da eta EA, PSE-EE eta PP aurka azaldu dira. Mozioan Sestaoko atentatua, PSE-EEko egoitzaren aurkako erasoa, 18/98 auziaren epaia, Marije Fullaondoren atxiloketa, EAE-ANVren ilegalizatzeko eskaria eta larunbatean Hernanin debekatu zen Etxeraten ekitaldia aipatzen dira, besteak beste, ´bizi dugun auzi politikoaren adierazpen` gisa. Mozioan, egoeraren azterketa orokorra egitea eskatzen da, izan ere, ´soilik bizi dugun egoera bere osotasunean aztertuz lortuko dugu indarkeria espresio guztien desagertzea`. Bestalde, Hernaniko EAE-ANV udal taldeak bere lanerako konpromezua berretsi du, helburu hau lortzeko.