Mobilizazio eguna deitua dago gaur azken atxiloketak salatzeko. Hernanin LAB sindikatuak kontzentrazioak deitu ditu eguerdiko 12:00etatik 12:30etara Gudarien plazan, Eziago poligonoan eta Lastaola poligonoan, Errepresiorik ez! Euskal Herriak hitza eta erabakia leloarekin. LAB sindikatuak dei egin dio ´euskal langileriari eta jendarte osoari` kontzentrazioetan parte hartzeko. LABek azpimarratu du operazio hauek ´ezker abertzalea zigortzea eta eztabaida zein egoera politikoa baldintzatzea` dutela helburu eta herri honek ´eskenatoki guztiz bestelakoa` behar duela: ´eskenatoki demokratikoa, gatazka konponduko duena`. Azken atxiloketak ezker abertzalearen aurkako eraso zuzena direla salatu du eta dio ´konponbide politikoa, Euskal Herriaren aitorpen nazionala eta borondate demokratikoaren errespetua` exijitzen duten sektore eta pertsona guztien aurkako eraso zuzena ere badela.
Manifestazioa
Ezker abertzaleak ere manifestazioa deitu du gaur, 20:00etan plazan, Gora Euskal Herria askatuta, Independentziari ateak ireki leloarekin. Herritarrei parte hartzeko deia luzatu die.