Astelehenean iparraldean atxilotutako hamabost lagunetatik sei lagun aske utzi dituzte, Askatasuna erakundeak jakitera eman zuenez. Aitziber Otegi hernaniarra da aske utzi dutenetako bat eta berekin batean Ageda Goikoetxea, Oskar Bizkai, Karine Leboucher, Ihintza Oxandabaratz eta Maider Agirre ere aske geratu dira. Atxilotutako beste bederatzi lagunek, tartean Urtzi Garcia hernaniarrak, inkomunikatuta jarraitzen zuten atzo arratsaldean.
Askatasunak montaia izan dela azpimarratu du
Askatasuna erakundeak prentsaurrekoa eman zuen asteartean eta polizia operazioa montaia bat izan dela salatu zuten. Urtzi Garciaren kasua azpimarratu zuen Askatasunak. Zenbait komunikabidek Donosti Komandoarekin erlazionatu dute Garcia eta horren aurrean, Askatasunak dio hernaniarrak bizitza normala egiten zuela Nafarroa Behereko Ortzaize herrian, bizi eta lan bertan egiten zituela ´eta mundu guztiak badaki`.