Gorengo mailako taldeak Zubipen jokatuko du gaur, hirugarren jardunaldian, eta bigarren aukera izango dute jarraian etxeko lehen garaipena lortzeko. Trintxerpe hartuko dute Zubipen, 16:30etatik aurrera, eta txapelketako aurreneko jardunaldietan hain garrantzitsuak diren puntuak biltzen jarraitzea dute helburu txuriberdeek. Joan den astean bi utzi zituzten Zumaiako igo berriaren kontra eta gaur hori errepika ez dadin saiatuko dira hernaniarrak.
Lehenengo gola sartzea izan daiteke gakoa
Gorengoak baja batzuk ditu gaurko partidurako, baina hori ez da aitzakia lehen minututik partiduaren bila ez ateratzeko. Klubetik adierazi dute gakoa lehenengo gola sartzea izan daitekeela, gero partidua irekiko litzatekeelako. Zalantzarik gabe, horrek mesede egingo lioke txuriberdeen jokoari. Gaur Hernanik sendotasunaren bidea hartu eta bide horretatik jo behar du txapelketa osoan, sailkapen on bat lortzeko. Trintxerpe ez da arratsaldea pasatzera etorriko, ordea, eta liga hasiera onari jarraipena eman nahiko dio. Talde pasaitarrak ondo hasi du txapelketa, eta bi garaipenekin hirugarren jarri da sailkapenean. Hernani 5garren dago, 4 punturekin.
Kadeteen bi taldeak ere Zubipen gaur
Gorengo mailako taldea ez da gaur Zubipen jokatuko duen bakarra izango. Bi talde kadeteek ere Karabel auzoko zelaian jokatuko dute, goizean biek. Kadete txikiek goiz jaiki beharko dute gaurkoan, 09:30etan tokatu baitzaie jokatzea, Errenteriako Touring-en kontra. Partidu hau bukatzean, Ohorezko mailako kadeteak Real Union hartuko du, 11:30etan.