Etxerat elkarteak zenbait ekintza antolatu ditu Euskal Preso politikoen eskubideak aldarrikatzeko. Gaur, hileko azken ostirala izaki, kontzentrazioa deitu dute, 20:00etan Gudarien plazan. Estatus politikoa orain, euskal presoak Euskal Herrira da kontzentrazioaren lema. Etxeratek salatu du euskal preso politikoak bizi baldintza gogorrenetan dauzkatela, bakartuta eta urrun diren kartzeletan ´dena debekatuta, interbenituta ala murriztuta dutela, lau pareta artean`. PSOE eta UMPk presoak horrelako baldintzetan dauzkatela dio Etxeratek ´eta neurri krudel horiek ondorio larriak dakartzate, ondorio fisiko eta psikiko larriak, besteak beste. Hala eragin dizkiete momentu hauetan preso dituzten gure 12 senide euskal preso politikori`, salatu du.
Angel Figeroaren kasua
Etxeratek Angel Figeroaren kasua azpimarratu du: ´kartzelako tentsioaren ondorioz, epilepsi krisi etengabeak jasaten ari da. Eta egoera ezin larriagoa amaitzeko, beste behin ere, jateari uko egiten hasi behar izan du`. Kondenak baldintza horietan eta oso-osorik bete arren, presoak ez dituztela askatzen ere salatu du Etxeratek, eta ondorio txarrak presoentzat eta hauen senideentzat direla ´jasaten ari garen istripu andana horren erakusle`. Etxeraten iritzian neurri politikoak dira horiek guztiak, ´etekin politikoak lortu asmoz baitituzte indarrean`. Kondena beteak eta gaixo larriak askatzeko eskaria Etxeratek gaurko kontzentrazioan eskatuko du gaixotasun fisiko eta psikiko larriak dituztenak eta kondena betea dutenak askatzeko, eta Euskal Presoak ´dagozkien eskubide guztien jabe izanik` Euskal Herrira ekartzeko.
Bihar errepidean
Bihar, larunbata, Etxerat elkarteak N-1ean eskatuko du Euskal Presoak Euskal Herriratzeko. Hernanikoak Billabonako sarrera aurrean jarriko dira. Bertara joateko zita, 11:00etan Atsegindegin.