Lokarri, Akordioa eta kontsultaren aldeko gizarte sareak, herri-kontsulta baten aldeko sinadura bilketa jarri du martxan herriz herri eta gaur Hernanin izango da sinadura emateko aukera. Herri kontsulta baten aldeko sinadura bilketa izango da, eta ´gizarteak modu zuzen eta demokratiko batean bere iritzia emateko aukera izateko` helburua du Lokarrik berak jakitera eman duenez.
Hiru helburu nagusi
Herri kontsulta honek hiru helburu hauek hartu behar ditu kontutan Lokarrik azpimarratu duenez: 1) ETAk biolentzia bazter dezala eskatzea. 2) Bazterketarik gabeko elkarrizketaren alde egitea gure arazoak konpontzeari begira. 3) Bakean eta demokrazian oinarritutako akordio bat lortzeko beharra azpimarratzea.
Furgoneta gaur Plaza Berrin
Lokarrik furgoneta bat darabilki herriz herri, kontsultaren aldeko sinadura biltzen, ekainaren 8az gero. Asmoa da uztailaren 15era arte ibiltzea furgoneta eta gaur izango da Hernanin. Goizeko 11:30etatik eguerdiko 13:30etara egongo da furgoneta Plaza Berrin. Bertan, herritarrek sinadura emateko eta herri ekimenari buruzko informazio gehiago jasotzeko aukera izango dute.