Botikarik gabeko barazkiak, pestizidarik gabeak, betiko moduan eginak... izen asko ematen zaizkio barazki ekologikoari. Beti ez da erreza izaten ordea, barazki horiek lortzen, eta horregatik, taldeak sortu dira; produzitzeko, eta kontsumitzeko. Hernanin talde bat sortu zen udazkenean, eta orain, beste talde bat sortu nahi dute, Hernanin interesa daukanik badelako oraindik. Uztaro Kooperatibak egin du deia, eta bilera gaur da, 18:30etan, Biteri kultur etxean. Bertan izango dira Kelo eta Mirene, Uztaro Kooperatibako bi kide, funtzionamendua nola den azaltzeko.
Garaian garaiko berdurak
«Negu garaia da orain, eta neguko produktuak jaten ditugu» dio Kelok, baratza-zaleak. Bestela pentsatu litekeen arren, negua ez da berdura garai txarra izaten, Kelok dioenez. «Aza, azalore, brokoli, eskarola, porru, erremolatxa, azenarioak... barazki faltarik ez da neguan. Akaso, ohitu gabe gaude garaian garaikoa jaten, baina segituan jartzen zara horretara. Baratza-mutur bat daukan edozeinek badaki zer den hori».
Barazki nahikoa izaten da urteko sasoi guztietan (udaberria izaten omen da kaxkarrena), Uztaroko kideek diotenez. Saski bat astero jasotzen duenak nahikoa barazki izaten du aste osorako, eta lau bat lagunentzako.
Saski bat, saski erdi
Saski osoa edo erdia hartu liteke. Familia batek saski bat behar izaten duela dio Mirenek, otarre bat hartzen urteak daramazki berak. Etxean kide gutxi direnek berriz, saski erdia hartu dezakete, eta asko dira hori egiten dutenak ere.
Astero barazki saski bat
Uztaro Kooperatibak 45 saski edo otarra banatzen ditu astero, Gipuzkoako zazpi herritan: Azkoitia, Andoain, Beizama, Billabona, Lasarte, Zarautz eta Zestoan. Orain, beste talde bat sortu nahi dute Hernanin; 8-10 talde, familia, edo otarra, hain zuzen.
Hilean bilera bat,
sei astean behin bilketa
«Baratza gurea da. Beizaman daukagu baratza, eta hiru liberatu dauzkagu. Baratza ondo egotea denon eginbeharra da, eta denon ardura. Horregatik, bilera bat egiten dugu hilero, bakoitzak bere herrian, eta beste bat, herri guztiak batera». Filosofia Madriletik dator, eta oso ondo funtzionatu du Euskal Herrian. Kelo hasieratik ari da Uztaron, eta horrela azaldu dio Kronikari: «taldekide guztion helburua bat da: barazki ekologikoak jatea. Hori lortzeko, kooperatiba gisa antolatu gara, eta bakoitzak bere ardurak ditu. Ni naiz baratzaren ardura daukana, beste bi kiderekin batera, eta taldeak ordaindu egiten digu horretarako. Planifikazioa denok egiten dugu, eta guk esku-lana jartzen dugu eta esperientzia. Baina baratza denona da, eta tarteka auzo-lana eskatzen dugu. Hori da politena».
Kuota, hilean 66 euro
Taldekideek 66 euro ordaintzen dituzte hilean. Informazioa: uztaro.nireblog.com.