Zein da zehazki enologo baten lana?
Gure lana da bodegak asesoratzea. Enpresetako enologoak guregana etortzen dira eta esaten digute ze ardo mota egin nahi duten, eta guk, mahastitik botilaraino, programa hori egiten diegu. Estatu espainiarrean eta Portugalen egiten dugu lan.
Zer erakutsi diezu Zilegi Eskolako ikasleei?
Esplikatu diet nola egiten den ardoa (gorria, beltza eta zuria): fermentazioa, alkohol bilakatzea eta abar. Eta gero, kataren atal ezberdinak: kopa usaitzea, zapore ezberdinak (fruta, lore usaia, egur usaia...). Botila manipulatuak erabili ditugu, jendeak zaporeak errazago bereizteko, eta gero dastatu ditugu botila komertzialak, ardo gaztetik Criantzara arte.
Ardo asko edaten da, baina zer dakigu ardoari buruz?
Bereizi behar dugu zer den ardo txarra eta zer ez zaigun gustatzen. Gero, markismoa ere oso zabaldua dago: Ardo gorria Nafarroan, Txuria Rueda edo Katalunian, eta beltza Errioxan. Baina hori ez da horrela, Errioxan oso ardo ona egiten da baina oso txarra ere bai. Probatzen ikastea da gakoa, eta gauza berriak hartzeko gogoa izatea.
Ze ardo mota edaten da gehien Euskal Herrian?
Criantza, batez ere, eta Erreserbako ardoa ere bai; kupeletan egondako ardoak, egurra deitzen zaiona. Euskal Herrian, poteatzeko, %80a kupeletan egondakoa izaten da. Rioja izendapenaren barruan, adibidez, %80a kupeletara dijoa, eta %20a inguru komertzioalizatzen da ardo gazte edo urteko gazte gisa.
Euskal Herriko ardoari eta Hernaniko sagardoari buruzko zer iritzi duzu?
Irulegiko (Iparraldea) eta Nafarroako beltz eta gorriak oso ospetsuak dira, eta baita Arabar Errioxako ardoak ere; sari asko lortzen dituzte. Sagardoa, ardoa baino atzeratuago dago teknikoki, baina sagardogileak lan asko ari dira egiten alor horretan. Konturatu dira ez dela hiru hilabeteko denboraldi bat, eta teknikak aldatzen ari dira sagardoa urte osoan saldu ahal izateko. Garapen haundia izan da sagardogintzan azken urteotan.
Ze aholku emango zenioke ardo kontsumitzaile bati?
Produktu berriak katatzeko beldurrik ez izateko, baina behin baino gehiagotan eta egoera ezberdinetan probatu behar dira. Mundu osoan egiten da ardo ona.
Sagardo dastatze profesionala Astigarragan
Xabier Kamio berarekin eta Angel Anocibarrekin (2006an munduko enologo onena) sagardo dastatze profesionala izango da Astigarragan, Sagardoetxeak antolatuta. Ekainaren 14, 15, 21 eta 22an izango dira dastatzeak, 10:00etatik 13:30etara, guztira 14 ordu. Prezioa 60 eurokoa da eta aurrez eman behar da izena Sagardoetxean (943-550575). Dastatzeaz gain, sagardotegi eta jatetxeetako sukaldeetan sagardoaren erabilera aztertuko dute Iñaki Gezala Oiarbide sukaldari hondarribitarrarekin, ekainaren 11, 18 eta 25ean.