Askatasuna erakundea Hernaniko preso politikoen egoera azaltzen ari da, hamabostean behin. Imanol Minerren egoeraren berri eman du gaurkoan.
2002an atxilotua Madrilen
Imanol Miner 2002ko maiatzaren 14an atxilotu zuen Guardia Zibilak Madrilen, ETAko kide izatea leporatuta. Askatasunak salatzen du bost egunez inkomunikatua eta torturatua izan zela: ´Etengabeko kolpeak eman zizkioten gorputz osoan zehar, elektrodo eta bainera mehatxuak, poltsa egin zioten manta batean bilduta eta hau zeloarekin inguratuta egonik...Tortura fisiko eta psikikoak jasan zituen egunero`. Epaile aurrean torturak jasan izana salatu zuen Minerrek.
Soto del Realetik Albolotera
Imanol Miner Soto del Realen espetxeratu zuten maiatzaren 19an eta handik Albolotera (Granada) eraman zuten 2002ko irailean. Orduztik han dago, isolamenduko moduloan. ´Albolote Hernanitik 903 km.-tara dago eta joan-etorriaren kostua 130 eurokoa da; urtean 6.240 eurokoa. 2004. urtean bere anaiak eta lagun batek istripu larria izan zuten bidaiatik bueltan. Zorionez ez zuten kalte pertsonalik izan` dio erakundeak.
Eskubide murrizketak
Askatasunaren esanetan, Imanolek murrizketak pairatzen ditu, ´euskal preso politiko gehienen berberak`: ´bisitetarako 10 lagunen zerrenda du eta kasu batean, baimena eduki arren, lagun bati bisita ukatu zioten han bertan. Horrez gain, astean 5 minutuko 8 telefono dei ditu (orain gutxi arte 5), paketeetan murrizketak (esaterako oinetakorik ezin zaio sartu), eta abar.