Oialume etxea bota egin zuten atzo, ´zaharkituta` zegoela eta, bertakoek adierazi zutenez. Duela 8 urte erabaki zuten botatzea, baina obra egitea eskatu zutenean Hernaniko udalean, etxea Astigarragako partean zegoela esan zieten, eta horregatik atzeratu da prozesua. Hondakinak kendu bezain laister, etxe berria altxatzen hasteko asmoa dute, jabeek Kronikari esan diotenez, ´taberna eta guzti, lehen bezala`. Oraingoan, berriz, altuera gehiago emango diote, ondoko etxearen pareraino.
Bikote askok elkar ezagututako lekua
Etxea ezaguna izan da 47 urteetan zehar, dantzaldiak egin direlako bere aterpean, ondoan dantzaleku berria egin zuten arte 1990ean. Hernani eta inguruko bikote askok bertan ezagutu zuten elkar eta etxekoek esan digutenez, pasiatzen pasatako jende askok adierazi die etxea botatzearen pena.