Aparkamentuena geroz eta arazo haundiagoa izaten da herrietan, geroz eta auto gehiago dagoelako nonbait. Hernanin ere izaten dira aparkatzea zail den egunak, asteburuetan batipat. Udaltzaingoak Kronikari esan dionez, jendea erdigunean aparkatzen saiatzen da egun hauetan, baina Floridan, Lidl inguruan, edo Santa Barbaran, Harrobipeko aparkalekuan, nahikoa leku izaten da. Astean zehar erdigunean denbora mugatuan aparkatzeko, debaldeko TAO eremua jarria du Udalak eta orain artean ´nahiko erantzun ona` izan duela esan dio Udaltzaingoak Kronikari. Informazioa merkatari eta auzo elkartearekin osatu nahi du Udaltzaingoak balorazioa egiteko, baina ´jendeak nahiko ondo errespetatzen duela eta bere funtzioa egiten duela` iritzi diote.
Gruarekin oraindik lasai
Hernaniko Udalak kotxeak kentzeko grua erosi zuela badira pare bat urte, normal erabiltzen zazpi bat hilabete badaramazkite ere. Udaltzainburuak Kronikari esan dionez, hauek dira gruak kentzen dituen ibilgailuak: baimenik gabe elbarrien aparkalekuetan daudenak, garaje sarreran aparkatu eta jabeak kejatzen direnak, autobus geltokian luze daudenak, seguru gabekoak, abandonatutako autoak eta abar, ´eta askotan aurretik jabea bilatzen saiatzen gara` dio. Oraingoz lasai hartu nahi dute, ´jendea ohitu arte`, eta espaloi gainetan, zebra bideetan eta abar daudenei multa jarri bai, kotxea ez diete eramaten normalean.
Gruaren gastua eta eguna
Gruak kendutako ibilgailuak Santa Barbarako aparkamentuan egindako eraikinera eramaten dituzte. Kotxea hartu nahi duenak 65,94 euro ordaindu behar ditu (multa aparte), eta bigarren egunetik aurrera errekargoa ere bai, 13,19 euro eguneko.
TAOari eta beste zenbait gairi buruzko bilera gaur Udalak eta Kaxko elkarteak
Kaxko auzo elkarteak, Antxon Costa eta Andoni Amonarraiz zinegotziek, eta Udaltzaingoaren arduradunak bilera dute egitekoa gaur TAO sistemari eta beste zenbait gairi buruz hitz egiteko. Bertan TAOaren gaia aztertuko da, eta martxan jarri zenetik orain arteko ibilbidearen balantzea egingo dute. Gai horren inguruan, auzotarren kezkak eztabaidatuko dituzte. TAOaz gain, txotx denboraldiaz eta karga-deskargarako ibilgailuen egoeraz ere ariko dira. Bilera 20:00etan izango da, Biterin.