Aurtengo inauteriek ere eman dute berea, eta atzo euripean despeditu ziren, ohikoa baino sardina ehorzketa motzagoa eginda. Eguraldia medio, arkupeetatik irten eta Plaza Berrin buelta hartu zuen prozesioak, eta Plazan bertan su eman zioten sardina erraldoiari. Kostata su hartu zuen sardinak euripean, baina aurtengo jaiak despeditzeko adina egin zuen.
Jende asko
Inauteriek iraun duten bost egunetan jende asko ibili da kalean, batipat gazteak eta familiak. Aurten ikastetxeak izan dira jai batzordeak omendu dituenak eta ikasleak izan dira beste behin ere jaieko protagonista nagusi. Emanaldi gehienak ere berei zuzenduak izan dira eta parte hartze haundia izan da gehienetan. Gaueko giroan, berriz, larunbatean jende dezente ibili zen Hernaniko Kaxkoan, eta azken urteetan ez bezala, jende asko eta asko mozorrotuta atera zen kalera.