Herriko ikastetxeetako ikasleek eman zieten atzo, merezimendu osoz, inauteri jaiei hasiera. Izan ere, beraiek izan dira azken urteetan inauteriak kolorez jantzi eta ekintza ezberdinetan parte hartu dutenak. Jai haierako ekitaldian, Plazan jarritako taula gainera 4 ikasle igo ziren eta txukun prestatutako bertsoak bota ondoren, Gora Hernani eta Gora Inauteriak! oihukatu zuten. Eguraldi eguzkitsuak lagunduta, Plaza mozorrotutako jendez bete zen. Ekitaldiaren ondoren Urumea ikastolako txaranga atera zen, eta atzetik segika, gazte mordoa dantzan.
Gaur goizean Axeri Dantza
Gaur goizean izango da Inauterietako aurreneko Axeri Dantza. Herriko zirrikitu eta pasadizo guztiak prest dituzte herritarrak ustekabean harrapatzeko. Bisitariak ere izango dira gaur herrian Goierriko Benta zaharreko mutil alaiak txaranga izango baita herrian zehar, goiz eta arratsalde. Txaranga, San Joan konpartsak ekarri du. Arratsaldeko 17:30etan Mozorro festa izango da, Tilosetan. Herriko zenbait gazteek, abesti bat hartu, eta emanaldi bat prestatzen aritu dira horren bueltan. Aurkezleak gazteak berak izango dira. Kantuz abesbatzak ere inauterietarako ekitaldi berezia antolatu du, parodia bat. Parodiaren gaia zein den ez dute aurreratu, herritarrak ezustean harrapatu nahi baitituzte. Arratsaldeko 19:00etan aterako dira, herriko kaleetan zehar.
Gaur Inauterietan
Otsailak 17, larunbata
-10:00: Azeri dantza.
-11:00: Betikoak txaranga.
-11:30: Zezenak, Latsunben.
-12:00: Benta zaharreko mutil alaiak taldearen irteera.
-13:00: Buruhaundiak.
-17:00: Berria pelota txapelketa, Altzako frontoian.
-17:00: Potxin eta Patxin pailazoak, Atsegindegin.
-17:30: Benta zaharreko mutil alaiak taldearen irteera.
-18:00: Betikoak txaranga.
-19:00: Mozorro festa, Tilosetan. Segidan zezen suzkoa.
-19:00: Parodia herrian zehar.
-00:00: Betikoak txaranga.