Zomorro heldu eta gazteek inauteri giro ederra jarri zuten Aranon

Joan den larunbatean ospatu zituzten inauteriak Aranon, giro onean, urteroko moduan, eta antolatzaileak gustora daude Kronikari esan diotenez. Azken urteetan susperraldi bat izan dute festek gainera, zomorroetan jende helduagoa ateratzen hasi baita berriz ere gazteekin batean, eta koadrila haundia elkartzen dira. Aurten, 35 bat lagun ibili dira baserriz baserri puska biltzen, Azpeitiko trikitilariak lagun zituztela eta Aranoko bazterrik gehienak pasa dituzte, goizeko 08:30etan hasi eta arratsaldeko 15:30ak arte.
Garai batean ohitura bihurtu zen adin jakin batekin jendeak erreleboa gazteei uztea, baina azken bi urteetan berriz hasi dira ateratzen garai batean zomorroz jantzita ateratako koadrilatako kideak eta horrek giro berezia eman dio festari, zomorroek berak azaldutakoaren arabera.
Aranon bizi den jendeaz gain, Aranokoa izan, baina kanpoan bizi den zenbaitek ere hartu du parte aurtengo inauterietan. Bazkaria elkartean egin eta Zagi Dantza egin zuten zomorroek Aranoko kalean eta ondorenean herri afaria izan zen. Herri afarian 71 laguneko koadrila elkartu zen eta Imuntzo eta Beloki trikitilariekin despeditu dituzte aurtengo inauteriak.