Askatasuna erakundea Hernaniko preso politikoen egoeraren berri ematen ari da, hamabostean behin. Kaleratu berri den Alberto Rey Domeq-en berri eman dute gaurko atalean.
1992an atxilotua
Alberto Rey Beto lehen aldiz 1992an atxilotu zuten Bilbon. 3 urte espetxean igaro ostean absolbitu eta kalean utzi zuten. 2002ko urtarrilean berriz ere atxilotu egin zuten, Frantzian, ETAko kide izatea leporatuta. Askatasunak azaldu du kartzela ezberdinak ezagutzea tokatu zaiola. ´Espetxean igaro dituen azken 5 urteetan, azpimarratzekoa da 2 urte guztiz bakarrik eduki dutela, lagunen bixita murrizketa haundiekin, eskutitzak irekita jaso eta bidali behar izanda. Bixita guztien ostean, miaketak egiteko aitzakiarekin biluztera behartu dute, eta abar luze bat. Miaketa hauetan, barrabilak altxatzeko eskatu izan diote, eta horretara ukatzeagatik zigortu egin dute: 40 egun mitard-ean (isolamendua) eta 4 hilabete bixitarik gabe`, azaldu du Askatasunak.
Kondena bete ondoren aske
Askatasunak dioenez, ´Aste honetan kondena beteta zuela Frantziako poliziak Espainiako mugan utzi du. Polizia Nazional eta enkaputxatutako Guardia Zibilek ordu eta erdiz, legez kanpo, erretenitu badute ere, azkenean aske geratu da. Orduan senide eta lagunei deitu ahal izan zien`. ´Beraz, Beto gure artean da berrriz ere, baina ezin ahaztu entregatua izateko arriskuan izan dela. Hau da, inongo kausa penalik ez izan arren, Frantziako poliziek Espainiako poliziaren eskuetan utzi, atxilotua izan eta ustezko delitu edo komisaldegian torturapean ateratako autoinkulpazioetaz baliatuz, berriz ere espetxeratzeko arriskuan izan da`. Betori omenaldia hilaren 25ean egingo diote, ´eta beste euskal preso guztiak aske utz ditzatela eskatuko dugu, baita ere`.