Adarraga Memoriala igandean izango da, eta aurten helduak ere izango dira umeez gain

Kronika - Erredakzioa 2007ko ots. 9a, 01:00

Landaren izango da, datorren igandean, 10:00etatik aurrera.

AURTEN helduek ere korrika ikusiko ditugu urteroko Hernaniko krosean, Adarraga Memorialean. Baina urtero bezala, protagonista umeak izango dira. Eskolarteko Gipuzkoako Txapelketa jokatuko da igandean, eta kadete, alebin eta infantil mailako Gipuzkoako ume mordoxka espero dute antolatzaileek, urtero bezala. Distantzia ezberdinak korrituko dituzte denek, baina 1500-4000 metro artean ibiliko dira.

Kros laburra helduentzat
Helduentzako Gipuzkoako Kros Labur Txapelketa ere jokatuko da igandean, lehen esan bezala. 4.000 metroko ibilbidea izango dute korrikariek eta 300-400 pertsona espero dituzte, iaz Lasarten bildu ziren hainbeste.

Zergatik Adarraga?
Adarraga Memoriala Juan Bautista Adarraga hernaniarraren omenez jarritako izena da. Juan Bautistak 1948an Londresko joku olinpikoetan diploma irabazi zuen, eta bere garaian lorpen haundia izan zen hori. Horregatik, CD Hernaniko eskudoak 5 aro olinpikoak daramazki eta Hernanin beti egin izandako krosari ere izen hori jarri zitzaion. Hernaniko krosaren 60 edizio egin dira, eta Adarraga Memoriala izena jarri zitzaionetik 44 edizio.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!