Elur Txorik antolatuta jende asko bildu zen Kalderero gaua ospatzera, ostiral gauean. Hungariatik etorritako Kaldereroen oroitzapena ez dute ahaztu hernaniarrek eta Elur Txoriren zitara hutsik egin gabe azaldu da aurten ere jendea. Afal ondoan, elkartetik bertatik atera zen koadrila, eta herrian buelta egin ondoren Plazan egin zuten azken festa. Tartean, Kardaberaz 67an gelditu ziren, Mallu zena gogoratzeko eta Oindi taberna parean ere egin zuten geldiunea.
Agurra udaletxeko balkoitik
Festa bukaeran, erregina eta damek testu bat irakurri zuten udaletxeko balkoitik, Hungariatik etorri direla eta Hernaniko herria agurtzeko. Konpartsako 4 abestiak kantatu eta bukatu zen aurtengo festa, datozen Inauterien iragarle ere badena.
Historia luzea
Hernaniko Kaldereroek historia luzea dute. Hariari tiraka ibili dira Elur Txoriko arduradunak, eta garai bateko festaren berri haundirik ez badago ere, berriz antolatzen, 1961ean hasi zirela jakin dute, orain 46 urte, hain justu ere. Orduz gero, urtero antolatzen du Kalderero festa Elur Txorik eta urteen poderioz, elkartearen bereizgarri bat ere bihurtu da bazkide eta bazkide ez direnak biltzen dituen zita.