Hernaniko Ezker Batuak kanpaina berri bat hasi du Bidezko fiskalitatearen alde lemarekin, eta ´kalitateko zerbitzu sozialen` eskariarekin. Lehengo astean eskuorriak banatu zituzten ferian eta kartelak jartzen ari dira herrian. Diputazioek onartu berri dituzten Errentaren Gaineko Zergak gaitzetsi ditu Hernaniko Ezker Batuak ´errenta altuenen alde egiten dutelako beste behin ere`.
Zerbitzu sozialak hobetzeko eskaria
Errentaren Gaineko Zerga berriekin diru gutxiago bilduko dela dio EBk, ´hain justu ere zerbitzu sozialei inpultsu bat ematea aurrikusia dagoenean, besteen beharra duten pertsonei bereziki`. Alderdiaren iritziz ´honen logika da, merkatua izatea zerbitzuak eskaintzen dituena eta herritarrak izatea erosi behar dituztenak`. Hemen egin nahi den erreformak PSOEko gobernu zentralak bultzatakoaren logika bera duela dio EBk, ´kapitalaren aurrean laneko errentak zigortzea, eta altuenei laguntzea`. Ezker Batuaren hitzetan, laneko errentek bilduko dute PFEZaren (IRPF) %70, eta beste fiskalitate bat posible dela uste dute, eta horregatik banatu dituzte beren proposamenak biltzen dituzten eskuorrioak.
Ezker Batuaren proposamenak
- Tipo marginal altuenak %55era igotzea, errenta altuenak gehiago ordaindu dezaten.
- Lanaren eta kapitalaren ordainketak parekatzea.
- Pizgarri fiskalak aztertu eta jaistea.
- Etxebizitzaren tratamendu fiskala aztertzea, eta gastu fiskalaren zati bat trasladatu, gaur egunean lehen etxea erosteagatik egiten diren dedukzioetatik, alkilerra bultza edo gai honekin lotura duen zuzeneko gastu publikora.
- Fundazio eta elkarteetara donazioak egiteagatik dauden dedukzio portzentajeak gogor jaistea, banku eta kapital haundiak zerga asko horrela jaisten baitituzte.
- Inspekzioa baliabide gehiagoz ornitzea, giza baliabideak nahiz teknikoak, fraudeari aurre egitea ezinbestekoa baita.