Javier Setien hernaniarra Afrika aldean ibili da hilabete honetan, Errege egunean hasi eta San Sebastian egunean bukatu den Lisboa-Dakar karreran. Senegaldik etorri berritan erantzun dio Kronikari; ´nekatuta baina ondo` azaltzen zen hernaniarra. Javier laguntzarako kamioi batean ibili da, Facundo Vitoria eta Joxe Mari Caminosekin, eta beraien lana logistika materiala, ordezko pieza mekanikoak, janaria, edaria eta abar garraiatzea izan da, guztira 11.000 kilo inguruko zama. ´Ibilgailuek etapa bukatu baino lehen, guk bukaera puntuan infraestruktura guztia prestatuta eduki behar genuen (argiak, erremintak, karpak...) mekanikariak lanean hasteko. Etaparen batean, bidean 1.400 km. egin ditugu `. Bataz beste 13 bat ordu egin dituzte kamioian egunero; Javier kopilotu bezala ibili da.
Facundo Vitoriaren deia
Javier Setienen bigarren urtea izan da desertuko probako karabanan. Aurten, Facundo Vitoria tolosarraren deia jaso zuen eta Javierrek ez zuen zalantzarik izan baiezkoa emateko: ´Facundok pertsona bat behar zuen nabigazio nozioak, GPSaren ezagutza, eta mundu osoko trabesietan esperientzia zituena. Nik baietz esan nion eta Rafa Tibau taldeko managerrarekin hitz egin ondoren, taldea osatu genuen`.
Rafa Tibau kamioak alokatzen dituen kataluniar bat da eta Javier Setien zijoan kamioa, Ralliart-Mitsubishi taldearen ibilgailu semiofizialen (eta mekanikarien) asistentziarako prestatua zegoen. ´60 bat lagun ziren guztira, tartean errusiarrak, txinoak, japoniarrak eta brasildarrak. Denek dastatu dute txorizo egosia eta kalimotxoa` adierazi du Setienek.
´Batzuk uste dute diruarekin edozer lortu daitekeela`
Javierrek uste du Dakarren amaitzen den proba ´aberatsen arteko jokoa` bihurtzen ari dela eta hori iruditzen zaio karreraren alde txarrena: ´batzuk uste dute diruarekin dena lortu dezaketeela, baina parte hartzaile asko dago hango jendearengatik gauza on asko egiten dituena`. Alde onena, berriz, ´zure burua espazio huts horien artean ikustea, gure bizimoduko zu-rrunbiloaz zer pentsatua ematen dizuna`.